75. Urteurrena

Futbol sailak hasi zuen bideak sekulako bilakaera izan du. Uneotan, 14 sail ezberdinek osatzen baitugu Aloña Mendi Kirol Elkartearen familia. Sail guztiak, elkarte bakar batean. Eta horrek, hein handi batean, erreferente izatera eraman gaitu. Esan beharrik ez dago Aloña Mendik egiten duen lanak kirol heziketaren ikuspuntutik, kirolzaletasunetik, herrigintzatik, lankidetzatik, osasunaren ikuspegitik onura handia ematen diola gure herriari. Eta lan horrek guztiak, egunez egun, denboraldiz denboraldi eta urtez urte, OÑATIARRON TAUPADIA osatu du.

2024 urte honetan gure elkartearen 75. urteurrena ospatuko dugunez, hainbat ekintza antolatuko nahi izan ditugu. Eta nabarmendu nahi genuke, horietan guztietan, herriko bestelako eragile ugarirekin batera jardun nahi izan dugula. Hala nola, Aloñako Lagunak, Eskola Kirola, herriko argazkilariak, marrazkigileak, Trauti, Hotz Oñati…bidelagun izango ditugu ospakizun festa honetan.

Era berean, esan, urteurren hau lau ardatz nagusiren bueltan eraiki dela hasieratik: ekarpen sozialean, parekidetasunean, jasangarritasunean eta elkartasunean. Eta azken honetan, ahalegin berezia egingo dugu gainera. Izan ere, jakitun gara guk baino behar handiagoa duten pertsona ugari dagoela mundu honetan.

Guzti horregatik, urteurrenerako propio sortu den merchandising-eko arropa salmentatik aterako den etekinaren zati bat Hotz Oñati elkartera bideratuko dugu. Herritik, herriarendako eta gurera datozen guztiendako sortu den egitaraua duzu honako hau.

Gozatu eta ez ahaztu: Aupa Aloña!